A TRESVERTUEUSE BELLE
& docte fille Catherine des Roches.
Sonnet.
Uant un solide corps s’oppose à la lumiere
De l’astre porte-jour ayant son teint vermeil,
Ou bien quand il descent d’un mouvement pareil :
L’ombre alors nous paroist imparfaicte ou entiere.
Mais quand sur le zenit ou dessus l’onde clere
Du saint puis des sçavans rayonne le Soleil,
Les ombres ne sont plus voyables à nostre œil :
Tout est illuminé dés l’œillade premiere.
De Proserpine ainsi les divines vertus
Ont laissé de l’honneur les autels revestus,
Par la lueur d’un feu qui pres du Nil s’enflamme.
Mais si tost que Charite a monstré sa splendeur,
L’ombre devient clarté tout resent son ardeur,
Mesmes les deitez reluisent par sa flamme.
A MESDAMES DES ROCHES
de Poitiers Mere & Fille.
Les Roches de Poitiers que le ciel & la grace
Ornent uniquement des plus dignes faveurs,
Monstrent par leurs escrits & leur divine face,
Que Phœbus & Venus leur cedent leurs honneurs.
