Plourez, bon Roy, bien vous devez douloir,
Plourer devez vostre grevance apperte ;
Plurez la mort de cil qui par desserte
Amer deviez et par droit de lignaige,
Vostre loyal noble oncle le trés saige
Des Bourgongnons prince et duc excellent ;
Car je vous dy, qu’en mainte grant besongne,
Encor dires trestuit a cuer dollent[1]
Affaire eussions du bon duc de Bourgongne.
Plourez, Berry, et plourez tuit sy hoir,
Car cause avez : mort la vous a ouverte ;
Duc d’Orliens, moult vous en doit chaloir,
Car par son scens mainte faulte est couverte ;
Duc des Bretons, plourez, car je suys certe
Qu’affaire arés de luy en vo jeune aage ;
Plourez, Flamens, son noble seignourage ;
Tout noble sanc, allez vous adoullant ;
Plourez, ses gens, car joye vous eslongne,
Dont vous dirés souvent en vous doullant
ffaire eussions du bon duc de Bourgongne.
Plourez, Roÿne, et ayez le cuer noir
Pour cil par qui feustes au trosne offerte ;[2]
Plourez, dames, sans en joye manoir ;
France, plourez, d’un pillier es déserte,
Dont tu reçoys eschec a descouverte,
Gar toy du mat quant mort par son oultrage
Tel chevalier t’a toulu, c’est dommaige ;
Plourez, puepple commun, sans estre lent,
Car moult perdez et chascun le tesmoingne,
Dont vous dires souvent mate et relent :
« Affaire eussions du bon duc de Bourgongne. »
Page:De Pisan - Œuvres poétiques, tome 1.djvu/306
Le texte de cette page a été corrigé et est conforme au fac-similé.
