Le texte de cette page a été corrigé et est conforme au fac-similé.
XXVII[1]
A Dieu, ma dame, je m’en vois ;
Cent fois a vous me recommande,
Je revendray dedens un mois.
Plus ne verray a ceste fois
Vo beaulté qui toudis amende ;
A Dieu, ma dame, je m’en vois.
Et de voz biens cent mille fois
Vous remercy, Dieu le vous rende,
Ne m’obliés pas toutefois ;
A Dieu, ma dame, je m’en vois.
XXVIII[2]
A Dieu, mon ami, vous command,
A Dieu, cil dont tout mon bien vient,
Et pour Dieu retournez briefment.
En plorant trés amèrement,
Puis que départir vous convient,
A Dieu, mon ami vous command.
Or ne m’obliez nullement,
Car toudis de vous me souvient ;
Baisiez moy au département,
A Dieu, mon ami, vous command.
