Coulour fine, vraie adrece,[1]
Tresce blonde, et bonne oudour,
Ardour, souesve simplece,[2]
Parece sanz nulle foulour,
Lucrece de simple cremour,
Brueil de soulas delictable,
Acueil bel et agréable.
Maistresse loyal, ma tenrour,[3]
Leesse plaisant, ma doulour,
Vueil dire a vous trés louable
Acueil bel et agreable.
BALADE A RIMES REPRISES
Flour de beaulté en valeur souverain,
Raim de bonté, plante de toute grâce,
Grace d’avoir sur tous le pris a plain,[4]
Plain de savoir et qui tous maulz efface,
Face plaisant, corps digne de louenge,
Ange en semblant ou il n’a que redire,
D’yre vuidié, a vous des preux ou renge,
Renge mon cuer qui fors vous ne désire.
Et j’ay espoir qu’il soit en vostre main
Main jour et nuit en gracieux espace,
Passe le temps, car ja a bien haultain
Atain par vous, et amours qui m’enlasce
Lasce mon cuer qui du vostre est eschange.[5]
Change vous fais de lui qui vous remire.
