ſel armoniac, vif argent & telles matieres ſeiches & bruſlantes facilement, multiplians le feu par quelque propre & interieure nature.
le cvr. Il y a des ſtratagemes & inuentions de tels feux artificiels dans Herodian, liure huictieſme, chapitre III.
L’Avt. Iove liure douzieſme de ſes hiſtoires, dit que Renze de Ceri, chef des Venitiens à Creme, voulant dreſſer vne camiſade, s’alla ietter ſur Syluie Sauelle, Lieutenant du Duc de Milan, & l’aſſaillit en ſon camp auec feux artificiels, trompes & pots de terre : ce qui eſtonna tellement les Sforſeſques qui tenoient ledit Ceri aſſiegé, qu’ils ſe mirent en ſuite, pluſieurs deſquels il occit & en mena grand nombre de priſonniers en la ville. Il y a d’autres exemples en mon Inſtruction, chapitre XII. où ie renuoye le Lecteur pour euiter prolixité.
le cvr. Mais que dites vous du feu gregeois ?
l’Avt. C’eſt vne certaine confection & bouïllement de charbon, faulx, ſalpeſtre, eau de vie, ſoulphre, poix, encens, fil de laine molle d’Éthiopie & cãphre.
