vendu & diuiſé & en pluſieurs parts. Zonare en la vie de Conſtans, raconte qu’vn Iuif l’achepta, dont il en chargea grand nombre de chameaux.
Le cvr. I’ay autrefois leu dans Euſebe de Ceſarée, liure neufieſme de la preparation Euangelique, chapitre II. & IV. que les planchers & thuilles du Temple de Hieruſalem eſtoit d’erain dorées, & y auoit deux colomnes auſſi d’erain eſgales en hauteur, contenans dix coudées de circuit, dorées de l’eſpoiſſeur d’vn doigt, l’vne à dextre & l’autre à feneſtre. En outre on y voyoit vne voûte du coſté de Septentrion ſouſtenuë de quarante huict colomnes d’erain, enſemble vne grande cuue où on lauoit les ſacrifices, ayant vingt coudées de haut & autant de large. Strabon liure ſeizieſme, adjouſte que la porte de ce Temple, du coſté de l’Orient, eſtoit pareillement d’erain & ſi forte & peſante, qu’à grand’peine vingt hommes la pouuoient fermer & ouurir.
L’Avt. Le ſouuerain Roy de la Chine, habite dans vn Palais contenant ſeptante neuf ſales d’vne telle grandeur,
