Page:Davelourt - Dictionaire artillier historique, 1623.pdf/71

65

que Charez Lydien, iadis apprentif de Lyſippus, fit à Rhodes : car elle auoit 70. coudées de haut : auſſi ne demeura-elle que 56. ans debout, & tõba par vn tremblement de terre, & neantmoins eſtant eſtẽduë, elle ſembloit encore prodigieuſe & miraculeuſe : car en premier lieu il y a peu d’hommes qui ayent la braſſe aſſez longue pour pouuoir embraſſer ſon poulce : auſſi ſes doigts ſont plus grands que beaucoup de ſtatuës qu’on void. Des endroits où ceſte ſtatuë eſt rompuë, on diroit que ce ſont cauernes garnies de groſſes & démeſurées pierres, que le maiſtre qui l’auoit faite y auoit miſes pour la tenir droite & ferme : auſſi dit-on qu’on demeura douze ans à la faire, & qu’elle couſta trois cens talens de façon, (reuenans à neuf vingts mil eſcus.) Or il faut admirer la folie des Rhodiens, qui firent dreſſer cette grande ſtatuë pour chaſſer la peſte qui infectoit lors leur ville, mettans leur eſperance en vn ſimulacre qui ne pouuoit ſubſiſter ny par ſoy-meſme, ny par toute l’induſtrie des hommes, & qui puis apres giſoit à terre foulé de tous, & en fin fut