autres ouurages de fondeur. Pour en ſçauoir dauantage, ie renuoye le Lecteur en mon Arcenal, chapitre III. & en mes Recherches, chapitre II.
Le cvr. Et bien que le cuiure ait eſté en plus vil prix que l’or & l’argent, neantmoins il les a accompagnez ou pour leur conſeruation ou pour decoration.
L’Avt. Les murailles du Temple de Serapis eſtoient premierement couuertes de lames d’or, ſur icelles il y en auoit d’autres d’argent, & ſur celles-cy d’autres de cuiure, ainſi que Rufin en fait mention au liure vnzieſme de ſes hiſtoires chapitres XXIII. Au milieu d’vne des portes eſtans au portique par le dehors de l’Égliſe ſainct Marc de Veniſe, ſe voyent quatre cheuaux de cuiure doré ſuperbement faicts, ayant chacun vn pied leué en l’air, comme s’ils vouloient marcher. Ils furent apportez de Conſtantinople, apres que les Venitiens l’eurent conquiſe, & eſtoient auparauant à Rome ſur l’arc triomphal de Titus & Vaſpaſien : mais l’Empereur Conſtans les tranſporta (comme la pluſpart des autres ouurages antiques & ſtatuës) en
