L’Avt. Pour ceſte occaſion, la Republique octroya à ces vertueuſes femmes, qu’à Rome ſeroit vn Temple conſacré à Venus la Chauue, ainſi que dient Firmian liure deuxieſme contre les Gentils & ledit Capitolin lieu ſuſdit.
Le cvr. Voila qui eſt bien allegué, mais pour refrain ie deſirerois ſçauoir que veut dire ce vieil quatrain :
Quand vn cordier cordant veut accorder ſa corde,
Pour ſa corde accorder trois cordons y accordez
Mais ſi l’vn des cordons de la corde deſcorde,
Le cordon deſcordant fait deſcorder la corde.
L’Avt. C’eſt à dire, qui ne ſçait ſon meſtier, l’apprenne.
Corſelets. Il y en a de blancs grauez pour caualiers, & autres plains pour piquiers. On dit que Philippe pere de Perſeus en auoit trente mil en ſon Arcenal.
Couleurine. Aucuns eſcriuent couleurine, ſecõde eſpece d’artillerie du calibre de France. Iuſte Lipſie liure troiſieſme de ſes machines, Dialogiſme troiſieſme l’appelle Colubrinam, l’ayant prins de Iove. Pierre Martyr en ſon nouueau Monde, Decade ſeptieſme, chap. VII. la
