queuës des cheuaux eſtre neceſſaires aux Baliſtes : mais il eſt ſans doute les cheueux des femmes, en ces machines n’auoir moindre vertu, comme a eſté apparu par l’experience de la neceſſité Romaine : car en l’oppugnation du Capitole, les machines gaſtées par continuel & lõg trauail, lors que l’abondance des nerfs deffaillit, les matrones & femmes offrirent à leurs maris combattans, leurs cheueux couppez, ſi que leſdites machines reparées & remiſes en eſtat, ils ont repouſſé la fureur des aduerſaires : car ces tres-pudiques femmes ont mieux aymé auec la teſte deffigurée pour quelque temps, viure librement auec leurs maris, que de ſeruir aux ennemis par vne entiere bien-ſeance. À tant mon Vegece. Outre luy ſont teſmoings Florus liure deuxieſme, chapitre XV. Capitolin, in Maximinis. Vitruue liure dixieſme de l’Architecture, chapitre XVII. Dion en Seuere. Ceſar liure troiſieſme de la guerre ciuile. Appiam des guerres Puniques, & autres.
Le cvr. Ô que ce bien-fait méritoit vne grande loüange & honneur.
