le cvr. Qui en a eſté l’inuenteur ?
l’Avt. Le ſieur Simon Steuin Hollandois.
le cvr. Mais l’inuention en eſt-elle moderne ?
l’avt. Non, d’autant que les Sinois, du Royaume que le vulgaire nomme auiourd’huy la Chine, ont certaines coches allans à voiles où la plaine des champs le permet, & ne ſont les chartiers moins adroits que les Nautonniers à manier le gouuernail, à receuoir les vents au diuers contournement des voiles qu’ils font auec le pied aduancé ou retiré comme beſoin eſt. Liſez Maffée, au ſixieſme liure de ſes hiſtoires des Indes.
Le cvr. Ô que Myrmecides ſe fit admirer par ſon induſtrieuſe ſageſſe, quand il fit ce char tant renommé à quatre rouës que l’aiſle d’vne mouſche couuroit.
L’Avt. Pline le raconte, liure trente-cinquieſme chapitre X. Si cela eſt vray, c’eſt vne merueille en l’art.
Chartil. C’eſt le corps d’vne charette, & dont on ſe ſert pour mener rouës haut
