tions de l’Europe tour à tour, & par fois toutes enſemble, ont ioüé pendant nos iours vne ſanglante tragedie. Ce grand Prince par ſa valeur les a renuerſées à bas, reſté au deſſus comme il eſt. Entre pluſieurs vers Latins eſtans à l’entour, il y a ces quatre en François ſeulement.
Tel fut Henry, grand honneur de la terre,
Aſtre de Paix, & vray foudre de guerre,
L’amour des bons, la crainte des peruers,
Dont les vertus meritoient l’Vniuers.
C
Calibre, ou qualibre. Il y en a de fer & de bois.
Le Cvr. A quoy ſeruent-ils ?
L’avt. Pour recognoiſtre ſi les boulets qui ſe font aux forges ſont du calibre de France & bien eſbarbez : ou s’il y a nombre de pluſieurs ſortes peſle-meſle en quelque ville ou magazin, pour les diſtinguer & ſeparer : de là eſt venu qu’on dit calibrer, pour comparer & eſgaler.