de bronze ſur lequel eſt la ſtatuë de feu Henry le Grand ſur ſon piedeſtal au pont Neuf à Paris.
L’Avt. C’eſt là où ie vous attendois : œuure digne d’eternelle memoire, que le Sereniſſime grand Duc de Toſcane Ferdinand, meu d’vn bon zele vers la poſterité, fit faire & ietter en bronze ceſte ſtatuë par l’excellent Sculpteur Iean de Boulongne, repreſentant à cheual ſa Majeſté treſ-Chreſtienne, que le Sereniſſime grand Duc Coſme ſecond du nom, fiſt acheuer d’elabourer par le ſieur Pierre Taca ſon Sculpteur, & l’enuoya en treſ-digne preſent ſous la conduite du Cheualier Peſcholini, agent de ſon Alteſſe, à la treſ Chreſtienne & treſ-auguſte Marie de Medicis, Royne Regente en France, l’an mil ſix cens quatorze en Aouſt, Lovys XIII. du nom Roy de France & de Nauarre, lors & à preſent regnant. Or ce piedeſtal eſt comme le theatre de la France, & vn abregé de la vie de ce grand Roy, repreſentant entre vne infinité de ſes actes heroïques, cinq, que Franqueuille a r’aſſemblez en ce ſubiet, où les diuerſes na-
