Veniſe entre les pulpitres il y a treize images de bronze, repreſentans la Vierge Marie & les douze Apoſtres.
le cvr. Paſſant par Florence, i’y ay remarqué quelques figures, dont il ne me ſouuient à preſent.
l’Avt. En la principale galerie du grand Duc, entre pluſieurs ſtatuës on y void celle antique de bronze de Scipion l’affriquain qui ſubiugua Hannibal & Syphax, & fiſt Carthage tributaire : Et à l’entour d’vn grand vaſe de marbre de la ſuperbe fontaine de ladite ville de Florence, il y a quatre Satyres & autant de Deeſſes qui iettent l’eau par diuers lieux, & és quatre coings dudit vaſe ſont quatre autres belles ſtatuës, le tout de bronze.
le cvr. Ie ſuis bien aiſe que cét excellent metal ſoit employé en choſes belles, non en de difformes & eſpouuentables comme ce taureau de bronze de Perille, dont ie deſirerois ſçauoir l’hiſtoire.
l’Avt. Ce Perille ſtatuaire & grand ingenieux pour gratifier la tyrannie de Phalaris Roy des Agrigentins en Sicile,
