ment, ou empeſché par la largeur ou grandeur d’icelles.
Le Cvr. On dit toutesfois que Patrocle ſe ſeruit des armes d’Achille, qui eſtoit beaucoup plus grand que luy, car comme dit Licophron, il auoit neuf coudées de hauteur.
L’Avt. Il eſt bien certain que Patrocle ſe ſeruit des armes offenſiues d’Achille, car ſe battant auec Hector, il auoit la targe & la picque & non les deffenſiues, qui eſtoient celles que Vulcan luy auoit forgées : Ainſi Dauid s’eſt ſeruy des armes de Goliath pour lui couper la teſte, car pour le regard de ſon corſelet qui eſtoit lors arme legere, & non à l’eſpreuue de l’arquebuze, ou mouſquet, il peſoit cinq mil ſicles : Or chacun ſicle peſe quatre dragmes, partant le corſelet peſoit deux cens huict liures quatre onces.
Le cvr. Veu doncques qu’il y a des armes offenſiues & deffenſiues, quelles ſont les offenſiues ?
L’Avt. Les mouſquets, arquebuzes, piſtolets, piques, hallebardes, pertuiſanes, lances, eſpées, & poignards, & peuuent
