* Il aura dix Ans aux prunes ou aux herbes ; vulg. c'est pour respondre à qui s'enquiert de l'aage d'vn cheual qui est desia vieil.
* De l’Andoüille apres soupper, c'est vne façon de parler licentieuse, pour l'action venerienne. vulg.
* Ange de Greue, i. crocheteur, gaigne-denier. C'est à cause de leurs crochets qui forment comme des ailes. vulg.
* Vn Ange entre deux Diables, on se sert de ce quolibet en se mettant au milieu de deux personnes, pour dire que le bon est au milieu de deux mauvais.
Il y a des Anglois en cette ruë là, i. je n'y veux pas aller, j'y dois de l'argent à quelqu'vn.
Angouleuent, i. nom propre d'vn basteleur.
* Vn Angouleuent, i. vn bon avalleur ; vn bon beuveur, par allusion d'engouler.
Allé en Angoulesme, par la mesme allusion d'engouler, i. avallé, beu ou mangé. vulg.
Anguille de haye, sorte de couleuvre.
A bon pescheur eschappe l’Anguille, i. vn habile homme peut perdre vne occasion.
Il y a Anguille sous roche, i. quelque danger ou mal caché dessous.
Escorcher l’Anguille par la queüe, i. faire vne chose à rebours. Et entreprendre vne chose difficile.