Nus chevals onques encore
Seignor car vos entaisiez ore
Fait li vaslez. si feroiz bien
Que ge né laisseroie rien
Por nul home de tot le mont
Issi la parole lor ront
Que plus parler nel en osent
Ainz vont colchier si se reposent
Jusqual main que li soleuz lieve
Mais de lor seignor moult lor grieve
Quil ne sevent si bel prier
Quil le puissent chastier
Si li avoit la nuit samie
Moult prie quil ni alast mie
A la bataille ainz fust enpais
Quil navoit nule garde mais
De Clamadeus ne de sa gent
Ne tot ce ne valut nient
Et si fu ce merveille estrange
Que moult avoit en la losenge
Grant doucor quele lui faisoit
Car a chascun mot baisoit
Si doucement et si soef
Quele li menroit la clef
Damor en la serre del cuer
Nonques ne puet estre a nul fuer
Quele len peust retrere
Que la bataille nalast faire
Si a ses armes demandéés
Cil qui les ot comandéés
Page:Chrétien de Troyes - Roman de Perceval le Gallois - MS 248.pdf/88
Cette page n’a pas encore été corrigée
