Page:Chrétien de Troyes - Roman de Perceval le Gallois - MS 248.pdf/56

Si a les sa mere laissiez
Et li prosdom feist abaissiez
Si lui chauca lesperon destre
La costume soloit tele estre
Que cil qui faisoit cheval.
Li devoir lesperon chaucier
Dautres vaslez assez i ot
Chascuns qui avenir i pot
A lui armes a la main mise
Li prosdom a lespee prise
Si len cainst et sil baisa
Et dit que donnéé lia
La plus haut ordre avoc lespéé
Que deus a faite et mandéé
Cest ordre de chevalie
Qui doit estre sanz vileinie
Et dit biau frere or vos soviëgne
Se il avient quil vos coviëgne
Conbatre a aucun cheval.
Ice vos voil dire et proier
Se vos enuenez al desus
Que vers vos ne puisse plus
Deffendre ne contretenir
Ainz lestuer amerci venir
Gardez que merci en aiez
Qua escient nel ociez
Ne parlez pas trop volentiers
Nus ne puet estre trop parliers
Que sovent tel chose ne die
Qui lui atort avileinie