Page:Chrétien de Troyes - Roman de Perceval le Gallois - MS 248.pdf/49

Dont grant bien venir vos verroiz
Et quoi fait il que vos creoiz
Le conseil vostre mere et moi
Par foi fait il et ge lotroi
Donc descendez et il descent
Un des vaslez son cheval prent
Des.ii.qui furent venu la
Et li altre desarme la
Si remest en la robe sote
Es revelins. et en la cote
De cerf mal faite et mal taillie
Que sa mere li ot baillie
Et li prosdom se fait lacier
Les esperons enchanz dacier
Que li vaslez ot aportez
Si est sor son cheval montez
Et lescu par la guige pent
A son col. et la lance prent
Et dist amis or aprenez
Darmes. et garde. en prenez
Coment len doit lance tenir
Et cheval poindre et retenir
Lors a desploie lensaïgne
Si ka prent et su li ensaïgne
Coment len doit son escu prendre
Un petit le fait avant prendre
Si qual col del cheval le joint
Puis met la lance a faute et point
Le cheval. qui.c.mars avoit
Que nus plus isnelement naloit