Page:Chrétien de Troyes - Roman de Perceval le Gallois - MS 248.pdf/19

Que la damoisele loi
Si esveilla et tressailli
Et li vaslez qui nices fu
Dist pucele ge vos salu
Si con ma mere le maprist
Ma mere menseïgna et dist
Que les puceles saluasse
En quel que leu que ges trovasse
La pucele de peor tremble
Por le vaslet qui fol li semble
Si se tint por fole provéé
De ce quil la sole trovéé
Vaslez fait ele tien ta voie
Fui. que mes amis ne te voie
Ainz vos baiserai par mon chief
Fait li vaslez. cui quil soit grief
Que ma mere le menseïgna
Ge voir ne te baiserai ja
Fait la pucele que ge puisse
Fui. que mes amis ne te truisse
Que sil te trueve tu es morz
Li vaslez qui les braz ot forz
La enbracie estroitement
Car nel sot faire altrement
Et iut for lui tote estendue
La pucele cest deffendue
Et guenchi qu’en que le pot
Mais deffense mestier niot
Que li vaslez en un randon
La baisa volsist ele ou non