Page:Chrétien de Troyes - Roman de Perceval le Gallois - MS 248.pdf/118

Ensemble o vos ne men irai
Ne deli ne departirai
Devant que ge lai enterre
Vos tandroiz cest chemin ferre
Si vos me creez par deca
Qui par cel sentier sen ala
Li chevals fel et estoltz
Qui ocist mon ami dolz
Mais porce ne lai ge mie dit
Que gel voille si dex mait
Que vos en ailloiz apres lui
Si voldroie ge moult son hennui
Autant con sil meust ocise
Mais ou fu cele espéé prise
Qui vos pent al senestre flanc
Qui onques dome ne trest sanc
Nonques ne fu a besoïgn trete 
Ge sai bien ou ele fu faite
Et si sai bien qui la forja
Gardez ne vos i fiez ja
Quele vos traïra sanz faille
Quant vos vendroiz a grant bataille
Car el volera en pieces
Bele cosine une des nices
Mon bon oste lui envoia
Ersoir et il la me dona
Et ge men tiene a bien paiez
Mais moult më avez esmaiez
Si ce voirs est que dit avez
Or me dites si vos savez