Au reste, c’est un grand traict de sagesse de sçavoir cognoistre le poinct et prendre l’heure de mourir : il y a à tous une certaine saison de mourir : les uns l’anticipent, les autres la retardent : il y a de la foiblesse et de la vaillance en tous les deux, mais il y faut de la discretion. Combien de gens ont survescu à leur gloire, et, pour l’envie d’alongir un peu leur vie, ont obscurcy et de leur vivant aydé à ensepvelir leur honneur ! Ce qui a resté depuis ne sentoit rien du passé, c’estoit comme un vieil haillon et quelque chetifve piece cousue au bout d’un ornement riche et beau. Il y a un certain temps de cueillir le fruict de dessus l’arbre : si dadvantage il y demeure, il ne faict que perdre et empirer, c’eust esté aussi grand dommage de ne le cueillir plustost.
Page:Charron - De la sagesse, trois livres, tome II, 1827.djvu/274
Cette page n’a pas encore été corrigée
