Page:Charron - De la sagesse, trois livres, tome II, 1827.djvu/259

C’est contre raison donc de regimber contre la mort, puis que par là vous vous acquittez de tant, et vous vous deschargez d’un grand compte. C’est chose generalle et commune à tous de mourir, pourquoy t’en fasches-tu ? Veux-tu avoir un privilege nouveau, et non encore veu, et estre seul hors du sort commun de tous ? Pourquoy crains-tu d’aller où tout le monde va, où tant de millions sont desia, et où tant de millions te suyvront ? La mort est egalement certaine à tous, et l’equalité est premiere partie de l’equité : (…). La troisiesme est d’ame forte et genereuse, qui se practique avec raison en une condition de vie publicque, elevée, difficile et affaireuse, où y peust avoir plusieurs choses preferables à la vie, pour lesquelles il ne faut doubter de mourir. Au pis aller il se faut tousiours plus aymer et estimer que sa vie : qui se met sur le trottoer et l’eschafaut de ce monde, faut qu’il se resolve à ce marché pour