Renaus li fix Aimon fu moult grains et iré
Quant vit Richart son frere abatu e[n]s ou pré.
Il a brochiet Baiart où moult se pot fier ;
Et a brandie l’ante o le fer acheré.
Où que il voit Ogier, grant cop li a donné
Que l’escu de son col li a fraint et troé.
Tant fu fors li haubers, maille n’en a faussé.
Pour tant li a Renaus si ruiste cop donné,
Poitrail, lorain ne chengle ne li a riens duré ;
Du destrier l’eslonga .i. grant pié mesuré.
Renaus prist Broiefort parmi le frain doré,
Et a dit à Ogier : « [Villains estez prouvés,]
Quant mon frere abatistes voiant tout le barné,
Et sommez d’un lignage et tout d’un parenté.
Selonc ta mauvaisté, te ferai ja bonté.
Tenes or le destrier qui moult fait à loer,
Par itel convenent que vous dire m’orres.
Se je vienz en besoing où je soie grevez,
Par le vostre, merchi faites moi autretel. »
« Sire, chou dist Ogiers, or avez bien parlé.
Qui de chou vous faurra, si soit desordenez. »
Renaus li tint l’estrier et Ogiers est montés.
A la roche Mabon li fu puis reprouvé
Où Renaus et si frere furent puis enseré.
Maugis sailli du bos à tout .m. adoubez,
Vinrent à Balenchon, si ont l’iaue passé,
Et deffient Franchois, si ont à auls jousté.
Là peüssiez veoir un estour criminel,
Tant cop ferir de lanche et de branc acheré
Amont parmi les elmez qui sont à or gemé,
Que le fu et le flambe en font amont voler.
Tant gentil chevalier y veïssies verser
Dont fuient par les landes chil destrier esgaré,
Los resnes traïnant, lor frains abandonné.
Franchois sont desconfit qui ne pueent durer.
Il tornerent en fuies, si ont les dos tornez,
Et Gascoing les encauchent de ferir abrievé.
Es tentes se ferirent, avoir ont pris asses,
Chevaus et palefrois et destriers sejornés
Et argent et or fin et boins paillez roés.
Paveillons et aucubes ont sor chevaus montez.
Maugis prist le dragon k’iert sor le Rollant tref
Et la tente de paille [où li boins dragons ert].
Page:Castets - La Chanson des quatre fils Aymon, 1909.djvu/979
Cette page a été validée par deux contributeurs.
951
appendice
