Renaus, le fix Aymon, maintenant respondi :
Mestre, ce dist Renaus, or ne vos hastez si.
N’en penrai que mon vivre, par le cors saint Remi.
.I. denier penré ge por avoir du pain bi.
Mes ge vos proi por Deu qui onques ne menti,
Paiez bien ces ovriers qui bien l’ont deservi.
Grant merveille a li mestres de ce qu’il a oï ;
Damedieu en mercie qui onques ne menti ;
Bien set que por s’amor ovroit Renaus ensi.
De faire la Deu œvre est moult amanevi,
Ne por chaut ne por froit onques n’en resorti,
Mes par efors ovra li chevalier gentis.
Autant fet par son cors, par verté le vos di,
Com font .IIII. des autres li plus amanevi,
Et chascune jornée, por voir le vos afi,
Ne prenoit c’un denier, si com avez oï.
Durement l’ont loé li mestre seignori,
Mes de toz les ovriers estoit forment haï.
Et dist li uns a l’autre : Or somes nos traï ;
Por ce felon truant somes toz resorti.
Se il vit solement .I. sol an et demi,
Touz li mostiers sera par li fet et forni ;
Ne gaaignerons mes vaillant .I. parisi.
Tant ont parlé ensenble li felon Deu menti
Que li ovriers saint Pere sera par eus murtri.
En .I. sac le metront quant il sera feni,
Ou Rin le geteront, ensi l’ont consenti.
.XII. pautoniers l’ont et juré et plevi
La mort Renaut jurée, si com avez oï.
Or ont li pautonier la mort Renaut jurée.
Iluec ot une pierre qui estoit grant et lée,
Par .IIII. des glotons ne pot estre portée ;
En pes et en amor l’a Renaus jus posée.
Touz se sont merveillié cil de l’avironnée.
Li gloton jurent Dieu et la Vierge honorée
Que la pierre sera desor Renaut getée.
Quant tans fu de diner, la gent est avalée
Et li ovrier descendent de la grant tor quarrée,
Le mestre ala mengier, n’i a fet demorée.
Page:Castets - La Chanson des quatre fils Aymon, 1909.djvu/96
Cette page a été validée par deux contributeurs.
84
les quatre fils aymon
