Là peüsiez [veoir] maint home mort jetez.[1]
Rollans point Vielantif par mult ruiste fiertez
Et va ferir Renaut, parmi l’eaume gemmez,
De Durendal s’espée, que tot l’a estonez.
« Renaus, ce dist Rollans, trop [par] estez desvez[2]
Qui enportez .Kllon. qui est vostre avouez.
Grant fais i enchargates, trop est pesanz d’asez.
Je cuit que c’est .i. fais que vous achaterez. »
Mult est dolant Renaus del roi qu’est eschapez
Et de ce que il fu de Durendal frapez.
Il a trete Froberge qui li pendi au lez,
Et a dit à Rollant : « Or ça, si recovrez. »
Come Rollans l’entent, vers lui est retornez.
Estes les vos au chaple, ensemble sunt meslez.
Atant es Aalart sor son cheval armez
Et Richart et Guichart, à Rollant sunt meslez.
Tot .iii. le vont ferir sor l’escu d’or listez.
Rollans par estovoir lor a le dos tornez
Et est venuz à l’ost donc il estoit [sevrez].[3]
Renaus, le fiz Aymon, est en Bayart montez
Et a dit à ses homes : « Bien somes enganez
De .Kalls. l’enperere qui nos est eschapez. »
« Sire, dient si home, pensez de recovrer,
Quer la nuit vient oscure, pres est de l’avesprer. »
Et Renaus fait ses grailles menuement soner
Et l’enpereor .Kllon. est mis el retorner.
Desi qu’à Monbendel ne voldrent arester.
« Par mon chief, dist li rois, bien puis ore desver,
Quant por .iiii. glotons m’estuet de champ torner. »
Rollans li vint devant, sel prist à conforter.
Or diron de Renaut qui ses cors fet soner
Et fait toz les barons et rengier et serrer.
Si les [a] fet trestoz à Bala[n]çon passer.
Guichart en apela et Aalart l’ainsnez.
La fin du ms. est d’après la version C qui se termine autrement que B ; mais à partir du v. 31, C continue par une transition d’une quarantaine de vers pour se raccorder avec la Mort de Maugis (V. Maugis d’Aigremont, p. 281-314). Je donne le commencement de la laisse d’après C : l’on est encore à Cologne.
