Endormis est Renaus, li fils au viel Aymon,
Et Aallars ses freres et Guichars li baron ;
En la queue derriere Amaugis li larron.
Or penst Dex de Richart par sa beneïçon,
Car se Jhesus n’en panse, ja n’i aura secors.[1]
Richars estoit as trés angoiseus et destrois ;
Les œls avoit bandés, les poins liés estrois ;
Tres par miliu des ongles en va li sans tos frois.
« Richart, dist l’emperere, vos pandres orendroit. »
« Certes, ce dist li enfes, sire, ce poise moi. »[2]
Charles en apela duc Namlon devant soi,
Richart de Normendie et Ullage l’englois.[3]
« Conseillies moi, dist Charles, franc chevalier cortois.
Richars, li fius Aymon, est de molt grant pooir.
Se [Renaus] vient as forces n’Aallars li irois,[4]
Ne [Maugis] li dervés qui molt fait à cremoir,[5]
.i. tel home i covient de moie part avoir
Qui Richart face pandre et qui me gart mon droit. »
Dont en apele Charles Berangier le galois.
Berangier, biaus amis, entendes envers moi.
Vos tenes de moi Gales et la terre as Irois ;[6]
Escoce et Danemarche deves tenir de moi.
Vos me deves en France servir à .iiii. rois.
Chascuns doit de mainie .m. chevaliers avoir.[7]
Berangier, je claim quite à vos et à vostre oir ;
Jamais deçà la mer servise ne ferois,
Si m’ales Richart pendre et je molt vos en proi,
Et se Renaus i vient, si i gardes mon droit. »
« Sire, dist Berangiers, car me soufres .i. poi.[8]
- ↑ 9920 M raenchon.
- ↑ 9925 M Dont est chen une chose que porter ne peut hons.
- ↑ 9927 M manque. B Berengier le gallois. Michelant note avec raison que c’est le nom du personnage auquel Charles s’adressera plus bas.
- ↑ 9930 L Maugis. M Renaus. M Aalars li adrois. B ne Guichart li courtois.
- ↑ 9931 L Renaus. M Et Maugis le larron qui moult fet à cremoir, Je sai chertainement Richars rescous seroit.
- ↑ 9936 M as Ylois.
- ↑ 9939 M en maison.
- ↑ 9944 M chen seroit honte à moi.
