L’escu par les enarmes a devant lui torné
Et prist son fort espié, tranchant ot afilé,
A .vi. clos de fin or le confanon fermé ;
Puis sailli en Baiart, estrier n’i a coubré.
Or s’en torna Renaus sor Baiart l’aduré ;
Aallars et Guichars et Richars sunt pasmé.
« Saint Simeon, font il, qui tenis le cors Dé,
Garde Renaut, biau sire, qu’il ne soit afolé. »
Et Renaus chevaucha par molt ruiste fierté.
Ki donc veïst Baiart cele terre entamer,
Au menor saut qu’il fait, .xxx. piés mesurés ;
Avis est qui l’esgarde que il doie voler,
Ne li veïssies pié ne jambe remuer ;
Et vient contre Rollant .i. arpent mesuré ;
Lors descendi à terre de Baiart le faé,
Son espié que il tint a fichié ens el pré,
Baiart i aresna son destrier abrivé ;
Et a desçaint Froberge, son bon branc acéré,
Et a pris son escu, sor son bras l’a levé,
Et vint au neveu Charle. Oies quele pité !
Son escu et son branc li a as piés geté
Et a ses mains croisies el nom de dame Dé.
Si haut com Renaus fu, li est au pié alés,
Plus de .vii. fois li baise les esperons dorés.
« Merci, fait il, Rollant, por icele pité
Que Dex ot en la crois, quant on l’i ot pené,
De Marie sa mere, quant il la vit plorer ;
Et il la commanda saint Jehan à garder.
Aies pitié de moi, gentis hom, fius de ber ;
Ja sui je de vo geste et de vo parenté,
Se le volies dire de povre bacheler.
Je devendrai vos hom et plevis et jurés
Et Aallars mes freres et Guichars autretel,
Et Richars tous li mendres, se vos le comendes.
Montauban vos donrai environ et en lés
Et Baiart mon cheval que j’ai ci amené,
Si nos faites au roi paier et acorder.
En la merci le roi seront nos iretés.
Se çou ne vos agrée, encor vos dirai el.
Page:Castets - La Chanson des quatre fils Aymon, 1909.djvu/574
Le texte de cette page a été corrigé et est conforme au fac-similé.
546
les quatre fils aymon
