« Sire, ço dist Ogiers, vos dites vostre bon ;
Mes or sofres un poi, si ores ma raison.
Si vos dirai la force, ensi com nos savon,
De Montalban la vile dont sont haut li donjon.
La tor en est assise par tel devision,
Nus n’i puet abiter de .ii. trais d’un bojon
N’à engien n’à perriere n’à mangonel roont ;
Si est si bien fremée, ne crient feme ne hom ;
Ne ja por nul effors que faire lor puist hon,
Ne perderont lor porte, por voir le vos dison ;
Ains prendront en Gironde tote lor venison
Es nes et es galies ki par là passeront.
Si a Renaus là ens tels [.iii]m. compaignons[1]
Qui por paor de mort ne lairont lor maison,
Et Maugis lor porcace tote la garison.
Cil lor truve asses et or fin et mangon,[2]
Chevax et palefrois et mules aragon.
Tant a Renaus là ens avoir et garison
Que, por tenir .vii. ans .iii.m. compaignons,
Ne doteroit vostre host le vallant d’un boton ;
Et sera molt grant honte, se nos les asseon,
Quant par droit anui nos en retorneron. »
Et quant rois Charles l’ot, si dreça le guernon ;
De mautalent et d’ire noircist comme carbon.
« Ogiers, dist li rois Charles, bien sai vostre raison ;
Nos savon voirement, que mie ne doton :
Vos volries avoir mis Broiefort l’aragon,
Que jo fusse ore en France, à Rains o à Ssesson
Et tot mi chevalier refussent en maison
Ou Renaus me tenist là ens en sa prison.
Vos estes de lignage Girard de Rossillon ;
S’estes cosin Renaut, le fil au viel Aymon.
Par icel saint Apostre c’on quiert el pre Noiron,
Il n’i a chevaliers qui tant soit rices hom,
Si [destornoit] Renaut de sa destrucion,[3]
Je nel feïsse ardoir et bruir en carbon. »
Page:Castets - La Chanson des quatre fils Aymon, 1909.djvu/463
Le texte de cette page a été corrigé et est conforme au fac-similé.
435
les quatre fils aymon
