Renaus si point Baiart, va ferir Guinemer,
Que escus ne haubers ne li pot contrester.
Parmi le gros du cuer li fist le fer passer ;
Et quant Charles le voit, le sens cuide derver.
Il broche le cheval, n’i vost plus demorer ;
Ja fera les batailles, se il puet, desevrer.
Bien voit k’al tornoier ne puet preu recovrer.
Charles nostre empereres est venus as François.
« Car vos en retornes, baron, ce dist li rois,
Se vos plus i estes, ja m’estera sordois.
Ne sera mais la perte restorée des mois. »
Il prist la grant enseigne, si la ploia en trois,
Ja s’en partissent tot Engevin et Mansois,
Quant par une bataille vint Bertrans li Puillois,
Et sist sor .i. destrier qui plus iert blans que nois ;
Et vait ferir Soïn qui fu de Vienois,
Que l’escus ne l’auberc ne li valent .i. pois.
I l’a mort abatu del bon destrier morois.
E vos atant poignant des fils Aymon les trois ;
De la venjance prendre sunt en molt grant esfrois.
A l’escrier des contes fu molt grans li tornois.
Ja i cherra de tex dont dolans iert li rois,
Que Bertrans i fu mors et Garniers et Gifrois,
Et tel .xv. des autres ne sunt pas des sordois.
Aelars point et broche le bon destrier norois,
Vait ferir sor l’escu le comte d’Estanpois
Que il ne li valut le pris d’un estanpois.
De l’auberc de son los li desrompi les plois
Que mort l’a abatu au destroit d’un marois,
Et quant Renaus le vit, si l’enclina .iii. fois.
Lor chevauchent ensemble, si passent les destrois ;
Devant les paveillons fu molt grans li tornois.
Li tornois fu molt grans devant les paveillons ;
La praerie iert grande, tes eslais orent lons.
La mainie Renaut s’escria à haus tons.
Là poïssies veoir fieres envaïsons.
Au fer et a l’acier i fu grans la tençons.
Là où li .iiii. frere tindrent lor confanons,
Entor eus assemblerent trestos lor compaignons.
