Trop nos ont cist gloton à mal faire aquelli.
Seignor, gardes qu’il soient richement envaï. »
Aimes point le cheval, de corre entalenti
Et fiert .i. sodoier del branc d’acier forbi,
Que la teste o tot l’iaume li a el champ gali.
« Pere, ce dist Renaus, feres le vos issi ?
Pieça vos et vostre home ne nos fustes ami ;
Mais s’or ne cuidoie estre de pechié mal baili,
Ja por prendre venjance n’alasse avant de ci. »
Li tornois commença de devant miedi ;
Mainte bataille i ot et maint estor forni
Et tante lance traite et tant escu croisi,
Tant hauberc jaserant derot et desarti.
Li roial s’escrierent : « Biau sire Dex, merci.
Empereres de France, trop nos mes en obli.
Fai venir tos tes homes, por coi atarges si ?
Ainc mais de tant de gent ne fusmes eskerni. »
Dont recuevrent François li chevalier hardi ;
La gent Renaut reüssent .i. arpent et demi.
Quant Aalars le voit, molt ot le cuer mari ;
Il a traite l’espée, si a l’escu saisi.
Ja se vendera chier, ains que il voist d’iki.
Li tornois fu molt fiers, quant il ont esbaudi.
Seignor, icist tornois fist forment à doter.
Ainc n’i ot parantage, quant ce vint au joster ;
Si ot maint home mort, quant vint à l’asembler.
Là peüssies veoir tant ruiste cop doner,
Tante roide hante fraite et tant escu troer,
Tant hauberc jaserant derompre et despaner,
L’un mort chaïr sor l’autre, trebuchier et verser.
Es vos par la bataille Huon de Saint Omer,
Et sist el destrier noir qui molt fait à loer.
Ne cuit qu’en toute l’ost trovast on pas son per.
Il voit venir Guichart à loi de bacheler ;
De tant com ses chevaus puet vers lui randoner,
Li ala son escu et percier et quasser,
Que lui et le destrier estut tot chanceler.
Sa lance a peçoie, si s’en vost retornor.
Quant Renaus li escrie : « Laires l’en vos aler ?