Empereres de France prenes .i. mesagier ;
Envoies à Renaut vo parole noncier,
Quant je voi mes enfans de ma franche moullier
Biaux et fors et puissans et nobile guerrier
Qui me devroient amer, servir et tenir chier,
Et je auls comme fis honnerer et aidier,
Et le[s] me convient si haïr et guerroier.
Mal dehait ait li roys qui me fist fianchier
D’aler contre mes fix que j’avoie chier,
Lors courut à Renaut sans plus de delaier.
Qui li donnast .c. mars et d’argent et d’ormier,
Ne se tenist il pas que nes alast baisier ;
Si tres fort a plouré que je nel sai nonchier.
He fix, dist li dus Aimes, que je avoie chier,
Onques riens tant n’amai, che sachez sans boisier.
Mar te guerroie, las, quant ne te puis aidier.
Quant Renaus se senti de son pere embrachier,
De la pité qu’il ot commenche à larmoier.
Qui veïst Aalart et Guichart souspirer
Et l’autre [frere] aussi ses cheviaux esrachier,
Trop par eüst dur cuer que pité n’en preïst.
De la pité des freres pleurent .c. chevalier.
Guichart se couroucha, si commenche à tenchier :
Peres, fait-il au duc, Dix vous doint encombrier.
Moult par eustes le cuer felon et pautonnier
Que sans metre en prison, sans batre et sans lanchier,
Fourjurastes ainsi les fiex de vo moullier.
[Mais] par ichel seignor qui tout a à jugier,
Se ne cuidoie avoir fors de Diu repairier,
Je vous fenderoie ja enfresi qu’el braier.
Biax fix, chou dist li dus, ne vous caut d’aïrier.
Jou ne puis pas faillir mon seignor droiturier,
Quant tu ne viens à droit à sa cours repairier.
Or vous tenes tout coi, ne vous caut de plaidier.
Le message Kallon vous vaurrai anonchier.
En vo terre est venus pour trestout essillier,
Et vous, s’il vous puet prendre, fera vif escorchier.
Par nous vous mande chi, à cheler ne vous quier,
Guichart li envoies, vo frere c’aves chier ;
A fourques le pendera ou le fera noier.
Peres, chou dist Renaus, or laissies le plaidier.
Par la foi que je doi au baron .s. Richier,
Se tant ne vous amasse entre vous et Ogier,
Je vous feïsse ja tous les membres tranchier.
Guichart n’est mie pris, n’encor mel voi noier.
Ains auera l’emperere moult d’anuis mestier
