« Li dus Bues d’Aigremont, vos ne le garres mie. »
Dont embrace l’escu, sa lance amont drecie
Et fier .i. chevalier qui avoit non Elie,
Que l’escus de son col ne li vaut une alie,
Ne li haubers del dos une pome porrie.
Parmi le gros del cuer son roit espié li guie ;
Mort l’avoit abatu del destrier de Surie.
« Outre, dist il, cuivers, li cors Deu te maudie ! »
Dont escrie s’ensaigne : « Ne vos atargies mie. »
Atant es vos venus tex .c. de sa mainie ;
De la gent au duc Buef i font grant deseplie.
Tant en ont abatu ; je n’en sai conter mie ;
De sanc et de cervele i est l’erbe jonchie ;
L’uns mors chaï sor l’autre à molt grande aschie.
Atant es Bernecon poignant par la chaucie,
L’escu tint preis de lui, si ne coarde mie
Et vait ferir Buevon sor le targe florie,
Si qu’il li a percie et le maistre ais croisie ;
Mais li haubers fu fors qui fu fais en Rossie,
Et li dus feri lui, c’ainc n’ama coardie ;
Ne haubers ne escus nel pot garentir mie ;
.c. et .l. mailles de son hauberc li plie ;
Del sanc k’ist de son cors est la sele moillie ;
Del cheval l’abati en la lande enhermie
Et li dus recheï, qui qu’en plort ne qui rie ;
Ençois que il remonte, aura mestier d’aïe.
Li dui baron se sunt à la terre abatu,
Bernecons et dus Bues â la fiere vertu ;
En piés sunt resailli, qu’il n’i sunt arestu.
Grand cos se vont doner des brans qui sunt molu,
Que les flors de lor hiaumes ont à terre abatu
Ja fussent entrocis li vasal conneü,
Quant de .iiii. parties i sunt la gent venu.
Tant pié i ot copé, tante teste sens bu,
Tant vaillant chevalier parmi le cors feru,
Et l’uns mors desor l’autre i chaï estendu ;
De sanc et de oervele i corut grant palu.
La gent le duc Buevon i sunt molt descreü ;
La moitié en sunt mort et de cest siecle issu ;
