Et me donnez pour le mieux
Un doux dormir.
Car d’ouyr incessamment
Vos saints propos,
C’est parfait contentement
Et seur repos.
LA PERFECTION DU CHRETIEN.
CANTIQUE.
Pour estre bien vray chrestien,
Il fault à Christ estre semblable,
Renoncer tout bien terrien
Et tout honneur qui est damnable,
Et la dame belle et jolye,
Et plaisir qui la chair esmeult,
Laisser biens, honneurs et amye ;
Il ne fait pas le tour qui veult.
Ses biens aux poures fault donner
D’un cœur joyeux et volontaire,
Et les injures pardonner,
Et à ses ennemys bien faire ;
Laisser vengeance, ire et envie,
Aymer l’ennemy si l’on peult,
Aymer celle qui n’ayme mye ;
Il ne fait pas le tour qui veult.
De la mort fault estre vainqueur,
En la trouvant plaisante et belle,
Voire et l’aymer d’aussi bon cœur.
