FABLE LXVIII.
DOU LION MALADE ET DOU GOUPIL[1].
Uns liuns fu mult travelliez
E de courre mout anuiez,
En une grave fist sun lit
Bien fu malades à sun dit.
Les bestes fist à sei venir
Car il voleit, ce dist, chosir
Qui miex purreit el bos cachier
E sa viande li pourcachier.
Li unes è autres si mandeit,
Les occicit è déwoureit ;
Mix les voleit einsi mengier
Qu’après courre et travillier.
Li gourpix fu aveuc alez
Hors de la grave est arestez,
Des novelles voleit oïr
Ainz qu’il vausist avant venir.
Li lions cil si esgarda,
Iréement li demanda
Purquoi ne volt venir avaunt,
Li golpilz li respunt à-taunt :
Sire, fet-il, ni ose entrer,
Car n’en vois nule returner
Des bestes qui ainc y entrèrent
E pur vus véir i alèrent.
MORALITÉ.
De cort à roi est ensement,
Tiens y entre légièrement
Mieuz li vaudroit plus loinz ester
Por les novelles escuter.
- ↑ La Fontaine, liv. vi, fable xiv, le Lion malade et le Renard.
