envies que le courage et l’ambition auroint mises dans nos cœurs, pour cooperer tous ensemble a l’effet de ce quy luy doit estre sy utile et a tout l’estat ; que Sa Majesté ne laisseroit pas de sçavoir un tres bon gré a ceux quy ne l’auroint pas prise, lesquels il reserveroit pour d’autres occasions quy ne seroint que trop frequentes dans le progres de cette guerre, et que pour nous exhorter a cela, il nous avoit assemblés tant pour prendre une determinée resolution comme pour faire que les uns et les autres s’entreaydassent a l’execution de ce quy seroit resolu ; et que le quartier des gardes estant le premier, c’estoit aussy a luy a quy il s’adressoit le premier pour sçavoir en combien de temps precisement nous voulions respondre de prendre la ville de Montauban. Mrs de Pralain et de Chaunes, et moy a leur suitte, apres avoir consulté ensemble, respondismes que nous y apporterions tout le soin, et la peine imaginable, et telle que Sa Majesté en seroit satisfaite, et que nous ne luy en pouvions limiter d’autre temps [pour la prise][1] sinon luy respondre que ce seroit plus tost ou plus tard selon la bonne ou mauvaise deffense des assiegés et selon les facilités ou inconveniens que nous y rencontrerions. Sur cette response, monsieur le connestable nous dit que messieurs de l’attaque de Picardie l’asseuroint de la prendre dans douse jours, et en mesme temps Mr le mareschal de Saint Geran dit : « Ouy, Sire, nous vous le promettons sur nostre honneur et sur nostre vie. » Nous luy dismes que
- ↑ Inédit.
