par un memorial que j’envoyai a don Baltasar de Suniga ; lequel conseil desira que je tinsse cela secret jusques apres l’expedition de l’affaire quy m’ammenoit et qu’en suitte je prendrois congé du roy, mesmes je m’en irois jusques a Bourgos pour m’en retourner, et en suitte que j’envoyerois un courrier pour dire qu’ayant eu nouvelle commission du roy, je m’en revenois faire cette condoleance.
Le samedy 17me nous nous assemblames avesques nos commissaires pour avancer nostre affaire et y vis quelque jour, dont je donnay avis au roy le jour mesme par courrier expres. Et parce que nostre reine m’avoit pressamment recommandé tout ce quy concerneroit le duc de Leerme, et que la comtesse de Lemos[1], sa sœur, et ses autres amis estoint au desespoir du mariage du comte de Saldaigne et me prioint d’ayder a le rompre par tous les moyens que je pourrois inventer, je le fus trouver a Saint Geronimo ou il avoit une chambre et feignoit d’estre malade, et moy de luy rendre sa visite ; et apres les reciproques complimens je luy dis que je ne sçavois sy je luy devois donner le parabien ou le pesame de son futur mariage parce qu’encore que ce luy en fut un grand contentement, neammoins qu’un galant de la court comme luy n’estoit pas sans desplaisir de quitter une sy douce vie qu’il menoit precedemment pour en prendre une retirée, pleine de peine et de soucis, comme estoit celle
- ↑ Catherine de Zuniga y Sandoval, sœur du duc de Lerma, était veuve depuis 1601 de Fernando de Portugal y Castro, VIe comte de Lemos. — Il y avait aux précédentes éditions : la comtesse de Ledesma.
