Le roy vint ce soir là coucher a Brin[1], et moy je m’en retournay au Pont de Sey, dont le chasteau avoit capitulé avec Mr de Crequy.
Le lendemain samedy 8me le roy partit de Brin et vint au Pont de Sey passant par dessus les reliques de la deffaite, et ne luy fut pas peu d’estonnement de voir la ville du Pont de Sey aussy entiere et les boutiques ouvertes comme s’il n’y eut point eu de gens de guerre, et de deux divers partis.
Le dimanche 9me les deputés de la reine vindrent avec ceux du roy, quy conclurent la paix qu’il plut au roy donner, laquelle il sinna le lundy 10me, et de là vint visiter au faubourg Mr de Nerestan quy pour le grand coup qu’il avoit, n’estoit point en mauvais estat et se fut garanty sy on l’eut laissé entre les mains du sirurgien Lion : mais les autres bourreaux de sirurgiens importunerent tant le roy, comme il estoit a Brissac, que le septième jour d’apres sa blesseure, estant en bon estat, on luy osta des mains pour le mettre en celles des sirurgiens du roy, ou il ne vesquit que deux jours.
Le roy sejourna encores le mardy au Pont de Sey, et le mercredy 12me en partit, et vint loger a Brissac[2].
Le jeudy 13me d’aust le roy envoya visiter la reine par Mr de Crequy a Angers, puis m’envoya au Pont de
