et luy dis que je m’estimois bien heureux sy je luy avois rendu quelque service aggreable, et que je la suppliois tres humblement de vouloir me desgager de la parole que j’avois donnée de sa part a madame la princesse de Conty du don de la reserve de l’abbaïe de Saint-Germain-des-Prés, puisqu’elle avoit contribué tout soin et industrie imaginable, non seulement envers monsieur son frere, mais aussy vers Mr d’Espernon, [pour les animer a ce][1] a quoy certes d’eux-mesmes elle les avoit trouvés portés, quy estoit de bien et dignement servir Vostre Majesté contre tout le monde. Elle luy confirma de bonne grace, et madame la princesse luy fit lors un double remerciement, tant de celle qu’elle venoit de recevoir d’elle, que de ce qu’elle avoit voulu assoupir l’affaire de monsieur le chevalier.
Après, madame la princesse s’estant retirée, je luy dis[2] que j’avois asseuré Mr de Guyse du retour de la Rochefoucaut, et de cent mille escus, mais que je ne luy avois point parlé de la lieutenance generale de Provence pour monsieur le chevalier son frere, ayant taché de faire comme ces vallets bons mesnagers, quy rapportent au fond du sac une partie de l’argent que leur maitre leur avoit donné pour despendre[3], et que, sy elle vouloit luy faire cette gratification, elle seroit bien plus grande maintenant qu’elle n’eut esté sy je l’eusse faite auparavant, ou bien elle pourroit reserver a luy faire cette grace a une autre occasion. La reine, quy estoit la plus genereuse et liberale prin-
