lés), que tout traitté que l’on pourroit faire avant ce temps la ne lieroit point Sa Majesté, et engageroit Vostre Altesse, quy rend tres humbles graces a Sa ditte Majesté de celle qu’il luy fait de jetter les yeux sur sa fille au dessein qu’il a de marier monsieur le dauphin. »
« La troisieme response que Vostre Altesse peut faire au roy est de le remercier tres humblement de l’honneur qu’il luy fait, qu’elle reçoit avesques toute sorte de respect et de joye ; qu’elle luy supplie tres humblement que cette affaire soit traittée avesques toute sorte de secret et de silence pendant quelque temps qu’elle tachera de disposer ses sujets a l’agréer, et ses parens a y consentir ; ce qu’elle fera le plus tost qu’il luy sera possible. »
« L’autre response est de recevoir au pied de la lettre l’offre du roy, vous y conformer et la conclure avesques joye et contentement, faisant de bonne grace ce que vous estes resolu de faire. »
« De ces quattre responses Vostre Altesse peut choysir celle qu’il luy plaira, et lors qu’elle me l’aura donnée, je la porteray à Sa Majesté sans y rien changer ny alterer. »
Ces divers conseils que je luy donnay le tindrent un peu pensif ; et moy, la dessus, je le quittay, le laissant avec le president Bouvet, quy avoit esté en tiers a toute cette conference : lequel president, revenant le soir a son logis, me rencontra devant ma porte, me promenant avesques plusieurs seigneurs et gentilshommes : je les quittay pour me promener avesques luy, quy me dit :
« Je pensois que ce que vous aviés proposé a S.A.
