Boullon vescut comme il souloit faire auparavant, nous mena disner a la table des chambellans, qu’il tint, et se fascha contre les controlleurs du roy qu’ils ne la servoint pas bien a son gré : mesmes, quand les trouppes se mirent en battaille devant la ville pour le passage du roy, il leur fit changer d’ordre, et leur commanda avec la mesme audace qu’il avoit accoustumé, tant cet homme estoit coustumier de commander partout.
Avril. — Le roy sejourna cinq jours a Sdan, au bout desquels il vint coucher a Mouson[1], puis a Busancy ou je le quittay pour m’en retourner a Paris, ou Antragues estoit de nouveau arrivée, de quy j’estois amoureux.
Le roy me commanda d’aller de sa part trouver la reine Marguerite quy avoit perdu Saint-Julien Dat, son galant, qu’un gentilhomme nommé Charmont avoit tué, a quy le roy avoit fait en suitte trancher la teste.
Il me donna aussy des lettres a porter a madame de Verneuil et a la comtesse de Moret. Je m’en allay cheux la première, parce que sa sœur y estoit ; et luy ayant dit en suitte que j’en allois porter une autre a la comtesse de Moret, elle eut envie de la voir, et m’ayant fait commander de luy donner par Antragues, de quy j’estois lors amoureux, je luy donnay : elle l’ouvrit, et apres l’avoir leue, me la rendit, disant que je ferois faire, en une heure, un chiffre pareil a
- ↑ Mouzon, chef-lieu de canton, arrondissement de Sedan, département des Ardennes. — Buzancy, arrondissement de Vouziers, département des Ardennes.
