Page:Anonyme - Macaire, chanson de geste.djvu/459

3158—3183

267

Macaire.

« D’un fil s’agiut ; quant le fis bautisier,
« Li rois d’Ongrie le vint en fons lever,
« Son nom li mist ; si se fait apeler.
« La dame vist, si l’ot en grant chierté,
« Et à son pere fist mesages mander.
« Et cil refist por sa fille envoier ;
« En sa cité se la fist amener.
« Por ele a fait cel grant ost asembler.
« Et si te puis par droit nom créanter
« Que cele dame à tout le bachelier
« De son pere est ens el demaine tref,
« Et qui la vuet, là la porra trover
« Et saine et sauve, sans point de l’encombrier. »
Quant li Danoi l’a oï si parler
Et tel raison et dire et deviser,
Qui li donast tot l’onor de Baivier,
Plus liés ne fust à jor de son aé.
Vers Varocher se vait il encliner,
Dedens le fuerre a mis le branc d’acier.
« Moult vos ai chier, ce dist il, Varochers ;
« Ne plaise Dieu, le verai jouticier,
« Que contre vos je vueille plus joster.
« Si com mon frere uimais vos tenrai chier
« Ne rien n’aurai, ne avoir ne denier,
« Que avec vos n’en soie parsoniers. »
Et Varochers l’en prist à mercier.