Grans fu l’estors et li chapléis fiers.
Qui donc véist tant nobles chevaliers
Costantinoble qu’ont laissié por joster
O les espées et ferir et chapler
Et ces grans cous doner et asener !
Cui un cop donent n’i a mestier proier
Que ne l’ocient, o lui o son destrier.
Floriadens vint par l’estor plenier,
Emmi la voie s’encontre avec Ogier,
Le bon Danois qui tant est preus et fiers.
Andui se fierent quant vient à l’encontrer,
Les targes fendent desi qu’as blans haubers ;
Mais cil sont boin, n’en vont maille fauser.
Les lances rompent d’ambedeus chevaliers,
Outre s’en passent sor les corans destriers.
Quant ont ce fait, s’en retornent arier
L’uns contre l’autre, irié come saingler.
Traite ont l’espée dont li pons fu dorés,
Et si grans cops se vont entredoner
Desor les elmes le feu en font voler ;
Mais nes empirent, que Diex lor vout aidier.
Totes les targes, les escus de quartier
Page:Anonyme - Macaire, chanson de geste.djvu/399
Le texte de cette page a été corrigé et est conforme au fac-similé.
2428—2449
207
Macaire.
Coment li Danois se fiert a Floriadent en l’estor.
