Page:Anonyme - Macaire, chanson de geste.djvu/372

180

2132—2158

Macaire.

« Qe soa file le diça envoier
« Qe elo à vos en dono à muler ;
« Por grant amor nos fa noncier.
« E se vos no la poez envoier,
« Tanto esmés quanto la poit peser,
« A fin oro vos la convent loier,
« De le milor qe se pora trover,
« De quel de Rabie, del milor e del plu cler. »
Dist li rois : « Duro est da otrier.
« De la dame e non o nul sper,
« E de l’oro, no se vol ren parler,
« Briga seroit tanto oro à trover. »
Dist li mesaçi : « El vos cunven penser
« De vos guarnir e pariler,
« E vos so ben dire sença boser
« Qe mon segnor, q’e orgoloso e fer,
« Vos en mande par nos à desfier. »
Dist li rois : « Deo soia nostra sper !
« A nos poir saveron defenser. »
A le parole dist N. de Baiver :
« Mesaçer frer, e no vos voio çeler,
« Gran torto oit li vestre enperer.
« Da pois qe l’omo a prendu sa muler,
« Ne le doit d’ele à faire ni son per ni sa mer ;
« Colu qe l’oit presa à nocier
« N’en poit fare d’ele le son voler,
« E tant qe vivo estoit ne se po desevrer,