Page:Anonyme - Macaire, chanson de geste.djvu/318

126

1497—1523

Macaire.

Si vol venir à le à parler.
Dist la raine : « E li voio vonter ;
« Ço qe li plait non voio contraster. »
Adoncha la raine se vait adorner
A meio qu’ela poit cun fema strainer.
E Primeran va li rois nonçer
Parilé est la dame d’oldir lo volonter
Et avec lui stare e conseler.
Adoncha li rois nen volse entarder ;
El est monté cun pochi çivaler,
Cun Primeran le venu à l’oster.
La dama, quant le vi in le oster entrer,
Contra lui se leve si le vait à incliner
E si le dist : « Ben venez, meser ! »
E li rois le dist : « Ben stia, ma comer ! »
Desor un banco i se vont aseter
Planetament anbes ad un celer,
E pois se prist anbes à conseler.
« Dama, fait il, molto me poso merviler
« De ves enfant, quant le fi bateçer,
« De un signo qe le vi sor la spala droiturer
« Qe non ait nul seno filz d’inperer.
« Unde, çentil dame, e vos voio enproier
« Por amor de Deo, li voir justisier,
« Si cun comadre qe non doit boser
« Par nul ren a li soe conper,
« Donde estes vos e qi vos fait erer,