« Quant el sera en fonte batiçé,
« E d’olio santo benéi e sagré,
« Par so droit nome elo sera clamé
« Primeran como eo sonto é. »
Quando vene li terme di oto jorni pasant,
Primeran ven à la dame e si la demant
Q’ela le die e baili quel enfant,
Q’elo lo porti à li batezamant.
E qela li dono e ben e dolçemant.
Donde Primeran in ses braçe li prant,
E in son mantel li vait envolupant,
Verso li monester el s’en vait erant.
Nen fo cun lui nula persona vivant,
Sel non fu Varocher qe va dre planemant.
En son col porte li grant baston pesant.
Avant qe in le monester el vait entrant,
E li rois d’Ongarie çivalça li davant,
Con molti çivaler de li son tenimant.
El vi Primeran, à demander li prant.
« Primeran, fait il, o alez si erant ?
« Qe avez vos en ves mantel pendant ?
