« Conter li voil tot mon engignement. » (*)
Li rois l’entent, s’en fu liés et joians.
De Saint Denis l’abé mande à itant ;
Et cil i vient volentiers, tot errant.(*)
Nostre emperere ne s’est mie atargié ;
De Saint Denis l’abé a tost mandé,
Et cil i vient volentiers et de gré.
Et l’ot li rois ens el plaissié mandé,
Là où li chiens tient Macaire serré
N’en puet movoir ne la main ne le pié.
De la bouche a bassetement parlé. (*)
Et quant li abes fu lez lui acostés,
Il l’araisonne si li vait demander
S’el a voloir de dire verité,
Que bien sait il com de l’oevre est alé
A ce que l’ot la roïne conté.
Et dist Macaires : « Ore me confessés
« Si m’asoilliés de tos les miens pechiés,
« Que je sai bien que à mort sui jugiés
« Et poi me valt tos li miens parentés. »
Et dist li abes : « Si grans est li pechiés
« Et cuit je bien que dites verité ;
« Mais neporquant, se le voir en contés,
