Mal de celui qui un sol mot en die. (*)
Por le cuivert chascuns si s’umelie,
Tant ont doté la siene segnorie.
Tot primerains a dus Naimes parlé :
« Gentis rois sire, ne le vos quier celer,
« De ces barons qui sont ci assemblé
« Et voi je bien tote lor volenté,
« Que por paor chascuns se trait arier,
« Des traïtors tant dotent la posté ;
« Mais je dirai un poi de mon pensé.
« Cil de Maience sont grant et honeré ;
« En Alemaigne n’est miex enparentés,
« Ne nen est hom en la crestienté
« Qu’à eus volsist faire bataille en pré ;
« Et de laissier joutice, ert grans pechiés.
« Conseil donrai selonc ma volenté,
« Et ne croi mie de nul en sois blasmés. (*)
« Pris soit Macaires qui en est apelés, (*)
« Et en bliaut si soit il despoilliés, (*)
« Et d’une brace ait baston mesuré,
« Et sor la place si soit fais uns plaissiés ; (*)
« Il et li chiens soient dedens mené,
« Li chiens Aubri, qui fu mors atrovés,
