Dont tot jent en fo amervellé.
A son segnor el fo reparié.
Naimes apella l’inperaor Karlon.
« Mon sir, fait il, entendés ma rason :
« Questa mervil jamais non vi nul hon.
« Se m’en créés, nu si en la faron :
« Nu seren parilés çivaler e peon,
« Quant le livrer vira, qe nu le seguiron.
« Non e sença mervile de ço qe nu veon. »
Dist l’inperer : « A Deo beneçion. »
E le levrer non fi arestason ;
Quant avoit fame, non fe demorason,
A Paris vene, como auseson.
Quant fo al palès, sor le mastre doion,
Le levrer guarde entor et environ,
Por veoir Macario se el poust o non.
E qui qi aient en ses man li baston
Feru li aust, sel non fu Naimon
Qe le contrarie si le crie ad alto ton :
« No le toçés por li oeli del fron. »
Cil le tasent, o il volist o non.
E l’inperer el duc Naimon,
E li Danois cun molti altri baron,
