Quant Jossiens voit mort Malatré son neveu,
Le cors en .ii. moitiés, ne peut muer ne plor :
« Mahon et Apolin, mal dehet aiés vous !
S’or ne faites justiche del quiver dolerous,
Qui m’a mort devant moi le fil de ma seror,
Le fer de ceste lance vous metrai el cors tout. »
Il hurte le destrier des tranchans esperons,
Et a baisié le lanche a tout le confanon,
Et vait ferir Elie sor son escu amont.
Desor le bende a or li peçoie et confont,
Le blanc auberc del dos li desmaille et desront,
Nu a nu lés le cors le roit espiel li coust :
« Par mon cief, » dist Elies, « tu es vasal mout prous.
Volentiers m’ocesisses, s’en eusses laissor ;
Mais Dieus m’aimme de ceur, qui me gara tous jours. »
Il a traite l’espee dont a or sont li poing,
Vait ferir le paien desor son elme amont,
Les pieres et les flors contre val en deront,
Tout le va porfendant enfressi el menton ;
Li ber estort son caup, mort l’abat el sablon.
Dist li rois Salatrés : « Enchantere est cis glous.
— Voir, » dist li rois Priant, « fuions nous entandous,
Autretel feroit ja et de moi et de vous. »
Dist li rois Salatrés : « Dit m’avés vilain mot ;
Mahomet me confonge et maldie mon cors,
Se je part del François si savrai son confort. »
